صرخة مواطن على جسر اللنبي للدكتور داود فلنة

جاي من عمّان
راجع للوطن
بعد غياب عشرين عام
مبسوط
غايب دهر
وجهي مفتّح
بعد عذاب وقهر
بصفّر للعصافير في النهر
للجسر قطعت
دخلت فلسطين ....
هلّلت
كبّرت
حفنة تراب قبّلت

كله تمام ...كله تمام ...
من وسط الزحمة
كنت ورا صرت قدّام
مجندة أثيوبية
بارودتها اطول منها
بكل ما تمتلك من قوام
طلبت الهوية
قالت الصورة ما هيّا
قلتلها انتي اجيتي هون
قبل يومين
قبل شهرين
قبل سنتين
وبتسأليني عن هوية
اطلّعي في شعري
وبشرتي وعيوني الكنعانية
قالت ما تكثر كلام
يلّا روخ غرفة مخابرات
قلتلها قبل أروح اسمعي مني
جوز كلام

وهناك شلحوني البنطلون
وطار عقلهم لما شافوا الكلسون
هيك ..هيك ..أختك
انت شو بتساوي في سوريا
قلت يا أنذال
اشتريته من شارع الملك طلال

* * *
سألني الضابط إنت جاي من وين ..؟
قلتلو أنا جاي من صفّا
اذا ما بتعرفها
جاية غرب رام الله
وأسم الداية اللي سحبت رجلي
ام عبدالله
انولدت فيها
وعشت وتعلمت فيها
دواليها مترامية ع السناسل
بتبوس الأرض بحنيّة
وهواها غربي
جاي من البحر
حامل معاه ريحة زهر
من بيارات حيفا
اللي بتتحدا الدهر
لكن انت من وين جاي ...؟
مواليد رومانيا ولا اليونان ؟؟
قال اخرس
أنا مواليد اللد
ضحكت ...ضحكت ...
قلتلو يا فرحة امك فيك
لما جابتك أجى العيد
عمر هاي الأرض
ما جابت عيون زرقا
ولا شعر إحمر ...!
تولد في اوكرانيا
وشوية تقولي مواليد ترقوميا
ولّا رفح أو جباليا
ولك إنتو نَوَر أوروبا
وما الكو علاقة حتى لا بموسى
ولا هارون
لعنة الله على بريطانيا
اللي جابتكم هون
قال اخرس .....
شو في معاك ....؟
قلت لوطني اشواق
قال وين جواز سفرك
قلتلو رميته في النهر
لأني من بلدي مش رايح اسافر
واذا في الهوية الصورة متغيّرة
يلّا سوى على بلدنا
بورجيك ستّي إم راضي وجاجاتها
وعمتي ام فيصل طابونها وقمحاتها
وجارتنا ام العبد توتتها وبامياتها
ومن مرّة بعرفك على ام عبدالله
قال مين ام عبدالله
قلتلو ..نسيت ...اللي سحبت رجلي
ورجلين كل اهل البلد
وكل واحد فيها انولد
وبنروح عند ابو ابراهيم
بتشوف كوشان الولادة
قال مين ابو ابراهيم
قلتلو المختار
وكوشان ابوي وجدّي وأبو جدّي
حتى توصل لكنعان
قال مين كنعان
قلتلو ...بتسألني مين كنعان ..؟
يا ابن رومانيا واليونان
لعنة الله عليك
وعلى اللي جابوك هان


د.داود فلنة